على زايور كان دائما يقول ونازل الاهلى بلباسه التقليدي الفانلة الاحمرة واللباس الابيض
مرة واحد كان بيعلق على ماتش نسائي قال
لفاول ده بقى هتلعبه سارة .. و سارة بالمناسبة شايلة مادتين فى ثانوية عامة ان شاء الله ربنا ينجحها و تدخل الكلية
مباراة لمصر وليبيا
كان الكابتن مدحت شلبى المعلق
كورة جت فى القائم للمنتخب المصرى
وقال : هوبا وتضرب فى القائم اليميين تضرب فى القائم اليميين ملكش حق ياقائم ملكش حق ياقائم
كورة تانية لميدو جت فى العرضة قال : ياااه فى العارضة ملكش حق ياعرضه ملكش حق ياعرضه
وبنهاية المباراة قال مع جهازنا الفنى ومنتخبنا الوطنى اللى بيثبت يوم بعد يوم ان مفيش احلى من السمنة البلدى
محمود بكر كان بيعلق على مبارة فى كأس العالم وكان التشيك بتلعب قعد ربع ساعة كل ما يقول جمهورية التشيك يقول جمهورية شبين فضحنا
كان ابراهيم يوسف بيعلق على مباراة وكان ليه افيهات كدة تضحك
فى بداية المباراة راح قايل اعزائى المشاهدين والمستمعين
ليه بنقول المستمعين .. يمكن يكون فى حد كفيف قاعد بيتفرج على المطش
في تعليق مجدي عبدالغني على ماتش البرازيل و تركيا في كأس العالم 2002 ..
كنت حاسس أن مجدي عبدالغني قلب الماتش فيلم كوميييدي .. و الله الماتش مكانش جامد .. بس أنا ضعت من مجدي عبدالغني و تعليقه اللي تحس أنه بيتكلم من ع القهوة اللي قدام التليفزيون من ناحية رمسيس هيلتون .. مش ممكن يكون قاعد في ستوديو و كده يعني ..!
هقولكم موقفين فاكرهم من الماتش ده .. "و ادي كافو بيعدي بواحدة حلوة .. واحدة من بتوع احمد عبدالباقي " .. خخخخخخخخخخخخ .. يعني كافو بتاع البرازييييل بيقلد أحمد عبدالباقي!
التانية بقى .. اتحسب بنالتي للبرازيل .. و اللاعب بتاع البرازيل شاطها في نفس الزاوية اللي حطها مجدي عبدالغني في ايطاليا 90 .. و النجم معدهاش طبعا .. و قال "بتفكركم بايه ركلة الجزاء دي؟ .. هاه؟ .. ايوة ضربة جزاء مصر في كأس العالم 90 .. عارفين مين اللي جابها جون؟ .. هااااه؟ .. مييييين؟ .. أنا! .."
عبد السلام الحمامصى
فى ماتش
انبى واتصالات بنى سويف من كام سنه
لاعيب من انبى شاط كوره اى كلام
كان تعليقه عليها
وشوطه حلووووووووووووة بس وحشه
وايضا كان ماسك لازمه طول المباره على اى اوفر يترفع من الجنب
يقول وواحده عرضيه بالطول لحد النهارده انا مش عارف يعنى ايه عرضيه بالطول
مرة الحمامصي في ماتش في الدوري السنة اللي فاتت واحد بيشوط كورة راح قايل وادي تسديدة حائطية (لحد دلوقتي مش فاهم كان يقصد ايه)
ده غير المعلومة الرائعة بتاعة ان فيه فرق بين التبديل والتغيير
في معلق على مودرن سبورت عليه عادة غريبة
حلوة حلوة حلوة
جميلة جميلة جميلة
يللا يللا يللا
مفيش كلمة غير لما يعيدها 3 مرات
مباراة بين الاسماعيلي وبلدية المحلة - في المحلة كان مذيع القناة الرابعة طول الشوط الأول يقول حسني (عابد ربه) وانتهى الشوط الاول 0/0 وبين الشوطين غيروا المذيع بواحد معروف وفاز الاسماعيلي 2/0
افتكر كان فى ماتش بس مش فاكر بين مين ومين من سنتين كده
بس كان احمد فوزى الجون بيوقف الحيطة فبدل ما يوقف الحيطة وهو على القائم لاء راحلهم يوقفهم
قام الواد اللى هيشوط الفاول حطتهالو والجون فاضى والجون ده كان فى اخر دقيقة
قعد يتفرج عليها احمد فوزى وهى جوه الشبكة والحكم حسب الجون لانه كان صفر
اللى كان بيعلق على الماتش كان محمود بكر على النيل للرياضة
فى عاده فى قناه النيل تستنى شويا بعد ما المذيع ينهى الماتش
محمود بكر افتكر ان الارسال خلاص انقطع قام شاتم احمد فوزى
وبيقول للمساعد اللى جانبه الجون ده تيت***** حد يروح للحيطه يوقفها . يستاهل
مرة برضو مجدي عبدالغني قال
كده مصر خدت كاس أفريقيا 5 مرات ,, و طبعاً احنا عارفين إن الكاميرون خدته 4 مرات ,, و غانا 4 هي كمان ,, و ما شاء الله كلهم أفارقة.
الكابتن محمد لطيف
اتذكر كانت مباراه للمقاولون العرب في بطوله افريقيا وقال جول جول جول جوووووووووووووووووول
والتفت لمن يجلس بجانبه وسأله ..هو مين اللي جاب الجول
وفي بطوله افريقيا التي اقيمت في ساحل العاج 1984 عندما شكر مسؤلي الامن ومحافظ ابيدجان علي التنظيم
اتذكر لميمي الشربيني انه كان يذيع مباراه للاهلي وقال
ماشي بيها مجدي عبدالغني 26 سنه ليسانس اداب وعازب
لكن كله كوم وعلاء الحامولي الله يرحمه كوم تاني
الزمالك يلاعب الاسماعيلي والاسماعيلي متقدم بهدفين لهدف ثم يتعادل الزمالك ونسمع صراخ الحامولي ثم يسنتر الاسماعيلي وينطلق خالد القماش ويحرز هدفا ثالثا للاسماعيلي فيقول الحامولي كلمته الشهيره والتي قالها اكثر من 3 مرات في تاريخه
ا....جون
علاء الحامولي بيذيع مباراة للمنتخب وعادل المأمور حارس المرمى ووصلته كرة سهلة جداوطبعا رتم المذيع هادي ..والكرة مع المأمور ...أ ** يا مأمور .... جون يا مأمور
إبراهيم الجويني في كأس العالم وكان باقي 25 دقيقة كان بيقول بطريقته باقي 25 سنة...واحد جنبه لفت نظره يقوم يقولآه آسف ..فات 20 دقيقة وباقي 25 سنة ...
علي زيوار (بتاع مامي) بيذيع مباراة للمنتخب الأليمبي بتاع خالد القماش وطاهر أبو زيدالقماش جاب بنلتي وحب هو يشوطه ..لكن المذيع عاوز طاهر أبو زيد هوه اللي يشوطالقماش سجل هدف لكن الكرة لمسة يد الحارسعلى زيوار ساب الماتش والدنيا كلها وفضل يهاتي ويزعق بصوته الوحشاللاعب ده ما بيسمعش كلام المدرب ده لازم يتعاقب ..المفروض يغيره ....المفروض يودوه القسم ..
كروان الإذاعة محمد لطيف بيذيع ماتش للمنتخب وفيه فاول قرب المنطقة تقدم ليها طاهر أبو زيدطاهر أبو زيد ...وشاط طاهر ...تيجي في ط *** ..تيجي في ظهره وخلاص
وكان مرة فى كاس العالم بيذيع مباراة للبرازيل وكان هناك لاعب اسمة فالكاو وكان مصر يقول اسمة فالساو وقال ان انا الوحيد اللى فى المذيعيين اللى بقول اسمة صح حتى مذيع البرازيل بيقوله غلط
ماتش للأهلي في التسعينيات تعليق النجم مصطفى الكيلاني .. ساعتها ياسر ريان شرخ في الشمال و رفعها لحسام حسن و حط حسام الهدف الأول للنادي الأهلي .. المهم بعدها بدقيقتين المخرج بيعيد الهدف بس بسرعته الطبيعية .. مصطفى الكيلااااني رااااااح مع الاعااااادة .. و فضل يقول و ماشي ياسر و ماشي ياسر .. بيعدي زي الجون الاولاني بالضبط و بيرفعها حلوووووة .. الهدف التاني للنادي الأهلي .. زي الهدف الأولاااااني بالضبط .. لحد ما اكتشف أنه اعادة .. سكت خمس دقايق و عمل من بنها .. و كمل تعليق عادي ....!
كان فيه ماتش للاهلي في بطولة عربية كانت في السعودية في التسعينات
وكان ساعتها اللي بيذيع الماتش ,,, المعلق الفذ سمير ابو السعود
وكان مهاجم الاهلي ساعتها هوه احمد كشري
المهم البيه ده من اول دقيقة في الماتش وهوه بيقول عليه بالحرف
احمد عبد المنعم او احمد كشري
كل كورة كل باصة كل شوية يقول كده, لحد مجت هجمة شبة انفراد
راح النابغة قال كل اللي هايقولة ده في ظرف 15 ثانية مثلا زمن الهجمة:
هوبا الكورة مع احمد عبد المنعم او احمد كشري
وماشي احمد عبد المنعم او احمد كشري
وبيعدي احمد عبد المنعم او احمد كشري
هايشوط احمد عبد المنعم او احمد كشري
جوووووووة الجوووون احمد عبد المنعم او احمد كشري
جون جميل جميل بيجيبه احمد عبد المنعم او احمد كشري
واحد صفر للنادي الاهلي واللي احرزة احمد عبد المنعم او احمد كشري
طارق يحيى كان بيعلق على متش مش متذكره المهم المحاور قال له تتوقع النتيجة ايه يا كابتن ؟ فرد يحيى وقال : اتوقع التعادل أو فوز احد الفريقين
عبد السلام الحمامصي فتى التعليق الأول .. كان بيعلق على ماتش لجنوب أفريقيا سنة 96 .. و جت الكرة لجو موشوي .. و طبعا الاسم كان بالانجليزي .. و الأخ الحمامصي خريج لغات اصلا .. و لما جه ينطق الاسم تخيلوا نطقه ازاي؟ .. قال .. و الكورة دلوقتي مع جون مشوي ..
عبد السلام الحمامصي: كان بيعلق علي ماتش للزمالك و الزمالك كان مغلوب و فجأة واحد من الجمهور اللي وراه قال " وشك نحس يا عبد السلام يا حمامصي يا ابن ال ...... " فضل ساعتها يقول الله الله الله و انا مالي انا ياريت الجمهور يكون ملتزم . بس كان شكله وحش قوي
حمادة امام مرة بيعلق علي مباراة لمنتخب مصر
وحازم امام كان بيلعب وكان في لاعب داخل عليه جامد
فحمادة امام في وسط الكلام سرخ: حاسب يابني
طرائف المعلقين..هاتموت الضحك
كابتن حمادة :إمام في برنامج السهرة الرياضية كان بيعلق على هدف في الدوري الياباني ,, الفريق اللي أحرز الهدف كان التي شيرت بتاعه عليه إعلان لشركة هوندا للسيارات مكتوب على ضهر التي شيرت ,, الكابتن حمادة حصل عنده لبس و قال الآتي :
هوندا ماشي بالكورة ,, لعبها ناحية اليمين ,, راحت لهوندا ,, لعبها عرضية نموذجية ,, دخل و حطها جوووووووووون ,, مين اللي حطها ده ؟ ,, مش ممكن !! ,, هوندا برضه ,, أصل هوندا ده اسم منتشر قوي في اليابان زي أحمد و محمد عندنا كده.
* محمود بكر ..
الراجل ده آخر ماتش أفتكر انى سمعتوا بيعلّق فيه كويس كان (مصر و هولندا .. أيطاليا 90 ) دلوقتى بقى بيهزى .. فعلاَ بيهزى .. سلسله من الكلام الغير مفهوم أو القدييييم طحن ..
"شيكل المباراه .. "
"المباراه باين عليها معقربه .. بلغه الكوره"
"الواد اللى بيضوحر مع الكوره"
لأ ولو لعبه عجبته .. بيفتكرلك ناس .. أبوك شخصياَ مايوعاش عليهم ..
يبقى زيدان مثلاَ بيرقص .. يقولك " وخدوا واحده كده من بتوع سمير قطب " .. مين سمير قطب ده يا عم ؟!!
أو روبيرتو كارلوس بيشوط .. يقولك " والله بيفكرنا بأبو حباجه وتوتو والناس بتاعت زمان دى " ..
* حماده إمام ..
دلوقتى .. أى كوره .. انشالله يكونوا لسه بيسنتروا .. تبقى " خطراااااااااااااه " و " حلوااااااااااااااااه " و" مين يقابل " و " يااااااااااااااااااا اااااااااااااه " و " الله الله الله على الحاجات اللى بتعجب الجماهير " .. طول الماتش .. لغايه ما يجيلك هيستريا .. والماتش لسه (صفر- صفر) ..
ليست هناك تعليقات:
إرسال تعليق